રેખ્તા
હિન્દવી
સૂફીનામા
રાજસ્થાની
શરૂઆત...
sharuaat...
કૃષ્ણ દવે
કૃષ્ણ દવે
એ જ આવીને ઝીણવટથી સમજાવશે, આ અમે જે કરી એ તો શરૂઆત છે.
એક આખી ગઝલ તો હવે આવશે, આ અમે જે કરી એ તો શરૂઆત છે.
બારણાં બંધ, બારી દીવાલો નડી, તે છતાં સ્હેજ અમને સુગંધી જડી,
વાત આખી હવે એ જ ફેલાવશે, આ અમે જે કરી એ તો શરૂઆત છે.
જાતને હું કસી આમ ઊભો રહું, ઝણઝણી કાનમાં વાત ધીમે કહું.
એ સ્વયમ્ આવશે, સૂર રેલાવશે, આ અમે જે કરી એ તો શરૂઆત છે.
કૂંપળોના લીલાંછમ ખયાલો લખી, ડાળીઓ પર લીલીછમ ટપાલો લખી,
વૃક્ષ પોતે જ ટહુકાને બોલાવશે, આ અમે જે કરી એ તો શરૂઆત છે.
હાથ પકડીને મોજાં ઘૂંટાવ્યાં અમે, શંખલા, છીપ, મોતી ભણાવ્યાં અમે,
માછલી સાત દરિયા લખી લાવશે, આ અમે જે કરી એ તો શરૂઆત છે!
સ્રોત
- પુસ્તક : શબ્દસૃષ્ટિ : ડિસેમ્બર - 2008 (પૃષ્ઠ ક્રમાંક 35)
- સંપાદક : હર્ષદ ત્રિવેદી
- પ્રકાશક : ગુજરાત સાહિત્ય અકાદમી