રેખ્તા
હિન્દવી
સૂફીનામા
રાજસ્થાની
ચંદન-તિલકનું શોભવું કોઈ લલાટમાં
Chandan-Tilaknu Shobhvu Koi Lalatma
રીના પરીખ
રીના પરીખ
ચંદન-તિલકનું શોભવું કોઈ લલાટમાં,
રાખી છે માની સાડી મેં મારા કબાટમાં.
સંતૃપ્તિની આ મોજમાં ડોલે છે મન-હૃદય,
મસ્તી થઈ છે સ્થિર હવે થનગનાટમાં.
શ્રદ્ધાની મ્હેક ઊપસી, પ્રત્યેક તાંતણે,
સંપૂર્ણ મન નિતાર્યું છે, ચાદર વણાટમાં.
ધીરજ ધરી તો કામ જે અડધાં રહ્યાં હતાં,
એ કામ પૂર્ણ થઈ ગયાં છે તરવરાટમાં.
થઈ જાતરા સફળ, ભલે મંદિર ખૂલ્યું નહીં,
માથું તો ટેકવી લીધું સૌએ કપાટમાં.
કાયમ રહે છે છૂટ ઘડામણ ઉપર ફક્ત,
સોનાનું મૂલ્ય એ જ છે પ્રત્યેક ઘાટમાં.
સ્રોત
- પુસ્તક : મનોમન (પૃષ્ઠ ક્રમાંક 89)
- સર્જક : રીના પરીખ
- પ્રકાશક : ઝેન ઓપસ
- વર્ષ : 2026