રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ચમત્કાર કોઈ થવાનો નથી

આદિલ મન્સૂરી

ચમત્કાર કોઈ થવાનો નથી

આદિલ મન્સૂરી

Roman

ચમત્કાર કોઈ થવાનો નથી

આ યમદૂત પાછો જવાનો નથી

નથી કોઈ ચહેરો તિરાડો વગર

કરચલી વગરનાં મકાનો નથી

પહેરેલા પડછાયે સૌ નીકળ્યા

હવે પાછા ફરવાનાં સ્થાનો નથી

ચિતા ઘરના આંગણમાં સળગી રહી

અલગ દૂર કોઈ સ્મશાનો નથી

દટાઈ ગયા ઘરની માટીમાં સૌ

કબરનાં જુદાં કોઈ સ્થાનો નથી

કઈ છેક પાતાળે કણસી રહ્યું

અને માર્ગ ત્યાં પહોંચવાનો નથી

પડી ભાંગ્યાં આખ્ખાં ને આખ્ખાં નગર

મકાનો નથી ને દુકાનો નથી

બધે ભૂતિયાં ખંડિયેરો ઊભાં

નથી કોઈ નામો નિશાનો નથી

હવે ખાલી મેદાન છે ચોતરફ

હવે તો અહીં ભય કશાનો નથી

બધાની કબર એકસરખી અહીં

અહીં કોઈ મોટો કે નાનો નથી

અહીં ત્રણ અક્ષરમાં આવી ગયું

મરણ વચ્ચે માતર કે કાનો નથી

હજી આંચકા રોજ આવ્યા કરે

આ યમદૂત પાછો જવાનો નથી

સ્રોત

પુસ્તક : ગઝલના આયનાઘરમાં (પૃષ્ઠ ક્રમાંક 71)
સર્જક : આદિલ મન્સૂરી
પ્રકાશક : રંગદ્વાર પ્રકાશન
વર્ષ : 2003