બધું મનમાં દબાવીને તમે બેસી ગયા કે શું!

ફરી ગરદન ઝુકાવીને તમે બેસી ગયા કે શું!

હવે તો શંખ ફૂંકો, જંગ છે અસ્તિત્વ માટેનો

અરે બાંયો ચઢાવીને તમે બેસી ગયા કે શું!

કલમ ઊંચકી શકો છો તો સુદર્શન પણ કરો ધારણ

બધા શસ્ત્રો છુપાવીને તમે બેસી ગયા કે શું!

ભૂલીને કર્મનો સિદ્ધાંત બસ ઉપદેશ દેવાને;

અહીં ધૂણી ધખાવીને તમે બેસી ગયા કે શું!

કર્યો છે પ્રેમ તો સ્વીકારવાની પણ કરો હિમ્મત

નર્યાં સપનાં સજાવીને તમે બેસી ગયાં કે શું!