આમથી તેમ જઈ આખરે મન રોઈ પડ્યું

આમથી તેમ જઈ આખરે મન રોઈ પડ્યું,

વાર્યું ઘરમાં તો ચડી છાપરે મન રોઈ પડ્યું.

એક તો શબ્દનો વિસ્તાર, પણ વળાંકભર્યો;

-ને વળી એમાં ખૂણે-ખાંચરે મન રોઈ પડ્યું.

યાદ કોની છે તેની સ્પષ્ટતા થઈ ન શકી,

સાવ અનુમાન અને આશરે મન રોઈ પડ્યું.

ઊંચકાઈ ને ઢળી સાંજની નજર નમણી,

કોઈ કિલ્લાને એક કાંગરે મન રોઈ પડ્યું.

આખરે રાત કવિતાની પણ થઈ પૂરી

-ને સવારે સખત ઉજાગરે મન રોઈ પડ્યું!

amthi tem jai akhre man roi paDyun