અમને જો કે રોજ જીવનની ખુશી મળતી નથી

અમને જોકે રોજ જીવનની ખુશી મળતી નથી

એ તને કોણે કહ્યું કે એ કદી મળતી નથી?

એ જ સુખ ને દુઃખ જીવનના, એ જ તું ને એ જ હું!

કેટલી સદીઓ ગઈ દુનિયા નવી મળતી નથી.

જેને ઝાલીને હું બચપનમાં બધે ફરતો હતો

મારી મમતાની એ નાની આંગળી મળતી નથી.

તમને છોડીને ગયો’તો એ પળો મળતી રહી

તમને આવીને મળ્યો’તો એ ઘડી મળતી નથી.

હર ગલી આ શહેરની એની ગલીમાં જાય છે

ને મને આ શહેરમાં એની ગલી મળતી નથી.

પ્રેમીઓએ કલ્પના જેની કરી વર્ષો સુધી

મારી ગઝલોમાં એ જન્નતની પરી મળતી નથી.

ક્યાંથી લોકોને મળે છે ફૂલના ગજરા, 'અદી'

અહીં તો અમને ફૂલની એક પાંખડી મળતી નથી.

amne jo ke roj jiwanni khushi malti nathi