રેખ્તા
હિન્દવી
સૂફીનામા
રાજસ્થાની
અળગા થવાની વાત, મહોબ્બત થવાની વાત
algaa thavaanii vaat, mahobbat thavaanii vaat
હરીન્દ્ર દવે
હરીન્દ્ર દવે
અળગા થવાની વાત, મહોબ્બત થવાની વાત,
બંને છે છેવટે તો નજાકત થવાની વાત.
પલળીશ એ ભયેથી હું શોધું છું છાપરું,
વરસે છે આસમાઁથી ઇનાયત થવાની વાત.
ઝાહિદ, કસોટી છે આ, ગમે તે પસંદ કર,
સિઝદો છે એક, એક ઇબાદત થવાની વાત.
પાસે રહું તો ભય કે વિખૂટા પડી જશું,
આઘે રહીને માંડું છું અંગત થવાની વાત.
સ્વપ્નો થવાનું એટલું સહેલું બની ગયું,
માણસને આવડી ન હકીકત થવાની વાત.
સ્રોત
- પુસ્તક : હયાતી (પૃષ્ઠ ક્રમાંક 51)
- સંપાદક : સુરેશ દલાલ
- પ્રકાશક : ચીમનલાલ લિટરરી ટ્રસ્ટ
- વર્ષ : 1984
- આવૃત્તિ : બીજી આવૃત્તિ