વીજળી પડી તો પાયાના પથ્થરને ખાઈ ગઈ

વીજળી પડી તો પાયાના પથ્થરને ખાઈ ગઈ,

શરૂઆતમાં એ કક્કાના અક્ષરને ખાઈ ગઈ.

વધતો કિનારો જોયા કરે છે વકાસી મ્હોં,

નાદાન માછલીઓ સમંદરને ખાઈ ગઈ.

સંદેશો જાણી જોઈને સમજ્યું નહીં કોઈ,

ઝેરી પ્રજાઓ પાક પયગમ્બરને ખાઈ ગઈ.

ઉપયોગમાં ન લેવાયં જો લાંબા કાળથી,

ઝીણી જીવાત આખાયે બખ્તરને ખાઈ ગઈ.

ઐયાશી ગુપ્તવેશે પ્રવેશી અને પછી

આળસ ભરાઈ એની કે લશ્કરને ખાઈ ગઈ.

ઉત્તમ લખે છે પોતે – ના ભ્રમમાં જ એ મર્યો,

જુઠ્ઠી પ્રશસ્તિ છેવટે શાયરને ખાઈ ગઈ.

wijli paDi to payana paththarne khai gai