ઐશ્વર્ય હો અલસનું, ઉપર તિલક તમસનું

ઐશ્વર્ય હો અલસનું, ઉપર તિલક તમસનું,

ઉન્માદ કેવું રક્તિમ છે રૂપ આ રજસનું.

ફાડી નથી શકાતું પાનું વીત્યા વરસનું

મનને છે કેવું ઘેલું આ જર્જરિત જણસનું.

પૂર્વે હો પારિજાતો, પશ્ચિમમાં પૂર્ણિમાઓ,

ચૌદ તરફ હવે તો સામ્રાજ્ય છે સરસનું.

બાહુ વહાવી દઈને બારીથી બારણાથી,

ઓછું કરી દો સાજણ, અંતર અરસપરસનું

પેટાવો પાંદપાંદે એ તળપદાં તરન્નુમ,

બૂઝાવો ધીમે ધીમે એ તાપણું તરસનું.

કેવા અસૂર્ય દિવસો! કેવી અશ્યામ રાતો!

કેવું ઝળક ઝલકતું મોંસૂઝણું મનસનું.

aishwarya ho alasanun, upar tilak tamasanun