રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

અઘરી વાત છે

મહેન્દ્ર જોશી

અઘરી વાત છે

મહેન્દ્ર જોશી

Roman

રોજ મનને વારવું એ છેક અઘરી વાત છે

કોઈના શરણ જવું એ છેક અઘરી વાત છે

કોઈના ખભે ચઢીને એટલું જોઈ શક્યા

વેંત છેટું ભાળવું એ છેક અઘરી વાત છે

આ ચરણનું મૂળ તો પાતાળ લગ પૂગી ગયું

મૂળને ઉચ્છેદવું એ છેક અઘરી વાત છે

ચાંચ હો તો ચણ ન હો ને પાંખ હો તો નભ ન હો

તોય પંખી પાળવું એ છેક અઘરી વાત છે

આંખ દાબી કોઈ વર્ષો બાદ પૂછે કોણ છું?

નામ ત્યારે ધારવું છેક અઘરી વાત છે

આ નદીમાં આંખના બે દીવડા તરતા મૂકી

આંસુને સંતાડવું એ છેક અઘરી વાત છે

સ્રોત

પુસ્તક : ઈથરના સમુદ્ર (પૃષ્ઠ ક્રમાંક 27)
સર્જક : મહેન્દ્ર જોશી
પ્રકાશક : દર્શક ફાઉન્ડેશન
વર્ષ : 2005