એવો કોઈ દિલદાર જગતમાં નજર આવે

એવો કોઈ દિલદાર જગતમાં નજર આવે,

આપી દે મદદ કિંતુ ન લાચાર બનાવે.

હમદર્દ બની જાય, જરા સાથમાં આવે,

આ શું કે બધા દૂરથી રસ્તા જ બતાવે?

શું એને ખબર, કોની નજર પ્યાસી રહી ગઈ?

જે ભેજમાં ચાલે અને પાલવ ન ઉઠાવે.

એ સૌથી વધુ ઉચ્ચ તબક્કો છે મિલનનો,

કહેવાનું ઘણું હો ને કશું યાદ ન આવે.

વાતોની કલા લ્યે કોઈ પ્રેમીથી તમારા,

એક વાત કરે એમાં ઘણી વાત છુપાવે.

રડવાની જરૂરત પડે ત્યાં સૂકાં નયન હો,

ને હસતો રહું ત્યાં જ જ્યાં હસવું નહીં આવે.

છે મારી મુસીબતનું, ‘મરીઝ’, એક આ કારણ,

હું મુજથી રૂઠેલો છું, મને કોણ મનાવે?

aevo koi dildaar jagatma najar aave