એ રીતે ગૂંથાઈ શ્વાસોની કડીમાં બા

એ રીતે ગૂંથાઈ શ્વાસોની કડીમાં બા,

હું સતત પ્હેરી શકું છું ચામડીમાં બા.

એ જ અચરજ, હોય છે ક્યાં ચાખડીમાં બા?

ખૂબ અથડાઈ છે બાધા-આખડીમાં બા.

બાની પૂંજી બાપુજી સમજી શક્યો છું પણ,

હું કદી જોઈ શક્યો ના ચૂંદડીમાં બા.

એ પછી એકેય અક્ષર ક્યાં લખાયો છે?

મેં જરા શીખી લીધી બારાખડીમાં બા.

ઘાટ આ મારો ઘડાયો એ જ કારણથી,

રોજ વ્હેરાયા કરી છે શારડીમાં બા.

ગામના રસ્તા ઉપર ખુલ્લા પગે ચાલો,

અનુભવાશે ઠેકઠેકાણે ખડીમાં બા.

Ae Rite Gunthai Shvasoni Kadima Baa