એ ભલે મારાથી અળગા થઈ ગયા

એ ભલે મારાથી અળગા થઈ ગયા,

મોકળા બંનેના રસ્તા થઈ ગયા.

જ્યાં વિનયથી સૌને મળતા થઈ ગયા,

દુનિયા સમજી 'નૂર' સસ્તા થઈ ગયા.

આજ એ શોધે છે મહેફિલમાં મને,

હાય! મૃગજળ આજે પ્યાસા થઈ ગયા.

કેવી તંગી છે જીવનમાં પૂછ મા,

મારા માટે આંસુ મોંઘાં થઈ ગયા.

કંઈક સમજો એમાં કિસ્મતનું સૂચન,

કે અચાનક આપ ભેગા થઈ ગયા.

કંટકો ખેંચી લીધા ખોટું થયું,

ફૂલના જખ્મો ઉઘાડા થઈ ગયા.

આજ શોધો છો તિમિરમાં 'નૂર'ને,

એના મૃત્યુને જમાના થઈ ગયા.

Ae Bhale Marathi Alaga Thai Gaya