રેખ્તા
હિન્દવી
સૂફીનામા
રાજસ્થાની
લાગણી ન મળી
laagni na malii!
લતીફ સુરતી
લતીફ સુરતી
અહીં રૂપમાં અમને કશી કમી ન મળી!
તલાશ દિલને હતી, એવી સાદગી ન મળી.
અનેક જિંદગી નીરખી છે મારાં અશ્રુએ,
વ્યથાથી ખાલી મને કોઈ જિંદગી ન મળી.
પ્રભુ, કહું ન પછી એને કેમ હું પાખંડ?
કે સ્વાર્થ વિણ તો અહીં કોઈ બંદગી ન મળી.
પ્રયત્ન લાખ કરું છું છતાંયે નિષ્ફળ છું,
લગાવી જોયું બધે દિલ ને દિલ્લગી ન મળી.
સભામાં આપની હસતો રહ્યો ભલે કિન્તુ,
હૃદયની વાત નિરાળી હતી, ખુશી ન મળી.
અનેક રીતથી મંજિલ મળી છે લોકોને,
અજબ છે વાત કે અમને હજુ લગી ન મળી.
કરી છે શોધ અમે દોસ્તોનાં દિલમાં પણ,
મળ્યું બધું જ, ફક્ત એક લાગણી ન મળી!
‘લતીફ’ દાનવોની શું શિકાયતો કરવી?
દયાના દેવના દિલમાંય લાગણી ન મળી.
સ્રોત
- પુસ્તક : મધુવન (પૃષ્ઠ ક્રમાંક 213)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન
- વર્ષ : 2002
- આવૃત્તિ : ચોથી આવૃત્તિ