અચાનક ધૂળમાંથી જે રીતે સિક્કો મળી આવે

અચાનક ધૂળમાંથી જે રીતે સિક્કો મળી આવે

અજાણી શેરીમાં એમ જ મને સ્મરણો મળી આવે

હથેળીમાં લખી એક નામ મુઠ્ઠી બંધ કર હળવે

પછી ખોલી જરા જો તો કૂણો તડકો મળી આવે

કરો પ્હેલાં જરા મંથનની પ્રક્રિયા તો સંભવ છે

ધુમાડાઓ ને ધુમ્મસમાંથી પણ રત્નો મળી આવે

પડ્યું છે એક ઠંડું શબ બરફપેટીમાં વરસોથી

હું ખોલી જ્યારે જ્યારે જોઉં તો તણખો મળી આવે

અહીં નવઘણ-કૂવાની જેટલાં ઊંડાં છે માનવ-મન

પરંતુ સાદ દો તો ક્યાંકથી પડઘો મળી આવે.

Achanak Dhulmathi Je Rite Sikko Mali Aave