આવો આવો પ્રતીક્ષાનો સૂરજ

આવો આવો પ્રતીક્ષાનો સૂરજ,

ડૂબવાની ઘડી થઈ ગઈ છે.

વિરહ ઘેલી હવે વેદના પણ,

લો નથી બેવડી થઈ ગઈ છે.

વાયરે કોણ જાણે ચમનમાં,

આજ સંકેતમાં શું કહ્યું કે,

ફૂલ ભૂલી ગયા ખીલવાનું,

કૈંક વિહ્વળ કળી થઈ ગઈ છે.

તારા પગરવની તો જાણ મુજને,

મોર ગહેકીને આપી ગયા છે

એ ખુશીને ખુશીમાં ખુશીથી,

બ્હાવરી આંખડી થઈ ગઈ છે.

ક્યાં પછી આ સુહાની ઘડીઓ,

આવ! તુજને ગળેથી લગાડું,

શું કરું આ વસંતી તમન્ના

આજ બેબાકળી થઈ ગઈ છે.

તારી અલ્લડ અદાઓના સોગન!

તારા 'બરબાદ'ની આ દશા છે.

સોણલાં - સોણલાં રહી ગયા છે,

યાદ પણ ધૂંધળી થઈ ગઈ છે.

aavo aavo pratiksha no suraj