દિશાઓ ફેરવો કાં તો વિચારો ફેરવી નાખો

દિશાઓ ફેરવો કાં તો વિચારો ફેરવી નાખો,

રહે જો દૃશ્ય એનું એ જ તો બારી નવી નાખો.

અમે એવા કે અમને જિંદગી પણ છેતરી નાખે,

તમે તો વાતમાં લઈ મોતને પણ ભોળવી નાખો.

જગતને ખોટ પ્હોંચે એ હદે ઓછું થયું છે કંઈક,

હવે એ ખોટ પૂરવા માનવીમાં માનવી નાખો.

શિખામણ આપનારું કોઈ જણ ઘરમાં નથી તો શું?

ખૂણો ખાલી જ છે, થોડાક પુસ્તક ગોઠવી નાખો.

પતંગિયું બેસશે એની ઉપર જો ફૂલ સમજીને !

સભા બરખાસ્ત થઈ છે મીણબત્તી ઓલવી નાખો.

dishao pherwo kan to wicharo pherwi nakho