યાદ ભૂંસાતી રહી કે હું

યાદ ભૂંસાતી રહી કે હું - ખબર પડતી નથી

જ્યોત બુઝાતી રહી કે હું - ખબર પડતી નથી

હું થતો ભરચક ફૂલોની સાવ વચ્ચેથી પસાર

મ્હેક વીંધાતી રહી કે હું - ખબર પડતી નથી

કૈં યુગોથી છું સફરમાં તોય પ્હોંચાયું નહીં

કેડી રોકાતી રહી કે હું - ખબર પડતી નથી

ક્યાં હવે પળને લીલીછમ રાખનારાં આંસુઓ

આંખ સુકાતી રહી કે હું - ખબર પડતી નથી

એક લક્કડખોદ ઘસતો ચાંચ સૂની સાંજ પર

ડાળ છોલાતી રહી કે હું - ખબર પડતી નથી

yaad bhunsati rahi ke hun