આંખમાં ખૂંચે નહીં એવી અણી છે છોકરી

આંખમાં ખૂંચે નહીં એવી અણી છે છોકરી,

તું ભલા સંભાળજે; ભારે ટણી છે છોકરી.

છોકરી જોતાં બને સૌ પૂતળા લોખંડના,

એમનો ઇલાજ આ પારસમણિ છે છોકરી.

આમરણ ઉપવાસ પર ઉતરી ગયા છે કેટલા,

એ બધાની સાવ સાદી માગણી છે છોકરી.

કેમનો સમજાય એને આ તમાશો પ્રેમનો?

હીર-રાંઝાની કવિતા ક્યાં ભણી છે છોકરી?

ભલભલા શાયર થયા પણ કોઈને ચાલ્યું નથી,

એક યા બીજી કવિતામાં વણી છે છોકરી.

aankhmaan khuunche nahiin aevii anii chhe chhokarii