આમ તો સામે જ હોઈશ તોય દેખાઈશ નહીં

આમ તો સામે જ હોઈશ તોય દેખાઈશ નહીં!

હું હવડ ખંડેરની છું ગંધ- સમજાઈશ નહીં!

હું યુગો જૂના કોઈ પથ્થર ઉપરનો લેખ છું,

હું હજી યુગો સુધી પૂરો ઉકેલાઈશ નહીં!

ઉચ્ચરાઈશ હું પ્રથમ ઉત્તર રૂપે ને એ પછી,

પ્રશ્ન રૂપે હું હજારો વર્ષ પૂછાઈશ નહીં!

ને પછી માયાવી મૃગ થઇને ફરી આવી ચડીશ,

તું ફરી દોડીશ પકડવા ને હું પકડાઈશ નહીં!

ચક્રનો અવતાર છું -ફરતો રહીશ ફરતો રહીશ,

સ્તંભ સ્મરણોનો થઈને ક્યાંય ખોડાઈશ નહીં!

હું વણજની વસ નથી, વેપારમાં વાવર ન તું,

હું કવિનો શબ્દ છું હું વ્યર્થ વપરાઈશ નહીં!

મન નથી મોતી નથી હું કુંભ કે દર્પણ નથી,

ને છતાં ફૂટી ગયો તો જોડ્યો જોડાઈશ નહીં!

aam to same ja hoish toy dekhaish nahin