રેખ્તા
હિન્દવી
સૂફીનામા
રાજસ્થાની
એ મૂરતિ કો’ કોણ છે?
a murati ko' kon chhe?
મણિલાલ નભુભાઈ દ્વિવેદી
મણિલાલ નભુભાઈ દ્વિવેદી
(ભૈરવી)
આંસુડાં મારાં લુવે એ મૂરતિ કો’ કોણ છે?
ચાલે જગર પાણી થઈ, રોકનારું કોણ છે? આંસુડાં૦
જામો નિરંજન નામનો, હું પ્રેમનો ઘેલો ફકીર,
એ જ જામો એ ફકીરી, ટાળનારું કોણ છે? આંસુડાં૦
છે દુનિયાં! તો નિત્ય હો; ના, છે નહિ; તો શું જુઓ?
છે ખરી! ને છે નહિ : એનો દીવાનો કોણ છે? આંસુડાં૦
સાચો સદા છે પ્રેમ, જેશું દુનિયાં બાધી હરામ,
દુનિયાં પ્રેમે નથી, કો નીતિરીતિ કોણ છે? આંસુડાં૦
દુનિયાં પ્રેમે નથી, પણ પ્રેમની દુનિયાં હજાર,
એ વિરંચિ, એ જ વિષ્ણુ : એ વિનાનું કોણ છે? આંસુડાં૦
એ જ મારું નામ, એની શોધમાં ગુલતાન તાન,
દુનિયાં માનું ફના : એના વિના એ કોણ છે? આંસુડાં૦
એની મઝા અંતર્ મને, કે જાણે કોઈ પ્રેમીજન,
પામ્યો હું કે પામ્યો નહિ એ પૂછનારું કોણ છે? આંસુડાં૦
એ જ આંસુમાં મણિ! ભીની મીચી રો’ આંખડી,
ખોલનારાં દૂર રો’, એ ઝાળ ઝીલે કોણ છે? આંસુડાં૦
સ્રોત
- પુસ્તક : મણિલાલ દ્વિવેદી સંચય (પૃષ્ઠ ક્રમાંક 172)
- સંપાદક : ધીરુભાઈ ઠાકર
- પ્રકાશક : ગુજરાત સાહિત્ય અકાદમી
- વર્ષ : 2002