યૌવનમાં ભરી દે

યૌવનમાં ભરી દે

સહસ્ર કિરણે સૂરજ પ્રગટે

ચેતન આ ચોમેર;

આભામંડળ પ્રભા પાથરી

એક કિરણ રવિદેવ!...

મારા યૌવનમાં ભરી દે:

યૌવન તેજોમય કરી દે.

સહસ્ર કળાએ શરદ પૂનમનો

ચન્દ્ર ચડે આકાશ;

શીતળતાના સાગર! મારે

એક કળાની આશ...

મારા યૌવનમાં ભરી દે :

યૌવન કળાયલ કરી દે.

સહસ્ર પાંખડી ખીલવીખીલવી

– પીમળભર પ્રત્યેક –

સુહાય પંકજ સરવર કંઠે;

એક પાંખડી એક...

મારા યૌવનમાં ભરી દે :

યૌવન સૌરભમય કરી દે.

સહસ્ર ધારથી વાદળી વરસે

સૌમ્ય સુધારસ પાન;

આપ આપ, ઓ હૈયાકુમળી!

એક બિન્દુનું દાન...

મારા યૌવનમાં ભરી દે :

યૌવન અમૃતમય કરી દે.

(અંક ૩૦)

Yuavanma bhari de