રેખ્તા
હિન્દવી
સૂફીનામા
રાજસ્થાની
વ્હાલપનું નામ
whalapanun nam
સુધીર દેસાઈ
સુધીર દેસાઈ
વ્હાલપનું નામ એ તો મધમીઠું નામ
એને બોલું તો કેમ કરી બોલું?...
ઉરનું આ દ્વાર એ તો પ્રીતમનું ધામ
એને ખોલું તો કેમ કરી ખોલું?...
તમે બોલ્યાં જ્યાં નામ હું તો ભૂલી પડી;
હું તો શમણાંમાં ક્યાંક ક્યાંક ઘૂમી વળી;
અરે! મનથી એ નામ મીઠું ચૂમી વળી!
સોનાનું નામ મારું પાડેલું નામ.
એને બોલું તો કેમ કરી બોલું?...
મારા મનની મંજૂષાની મોંઘી મૂડી;
કોઈ બોલે જ્યાં નામ મારી ખણકે ચૂડી;
મને પાંખો ફૂટે ને હું તો જાઉં ઊંડી.
મનના ગોકુળિયામાં નટખટનું નામ
એને બોલું તો કેમ કરી બોલું?...
વ્હાલપનું નામ એ તો મધમીઠું નામ
એને બોલું તો કેમ કરી બોલું?...
સ્રોત
- પુસ્તક : ઉત્તરાયણ (પૃષ્ઠ ક્રમાંક 90)
- સંપાદક : દીપક મહેતા
- પ્રકાશક : નેશનલ બુક ટ્રસ્ટ, ઇન્ડિયા
- વર્ષ : 2008