રેખ્તા
હિન્દવી
સૂફીનામા
રાજસ્થાની
વાતોની કુંજગલી
watoni kunjagli
જગદીશ જોશી
જગદીશ જોશી
વાતે વાતે તને વાંકું પડયું :
ને મેં વાતોની કુંજગલી છોડી દીધી.
શબ્દોને પંથ કોણ કોને નડયું?
મેં તો વાતોની કુંજગલી છોડી દીધી.
આંખોમાં વાદળાં ને શ્વાસોમાં વાયરા:
પણ અડકો તો ભોમ સાવ કોરી:
તારા તે કાન લગી આવી ઢોળાઈ ગઈ
હોઠ સમી અમરત કટોરી.
પંખીની પાંખમહીં પીંછુ રડ્યું:
મેં તો વાતોની કુંજગલી છોડી દીધી.
હવે ખળખળતાં ટળટળતાં અંધાર્યા જળ
કે અણધાર્યો તૂટી પડ્યો સેતુ:
પાસે રહીને મને લાગે છે કેમ હવે
કેટલાય જનમોનું છેટું!
મારાં સપનાંને વેદનાનું વૈકુંઠ જડયું:
ને મેં તો વાતોની કુંજગલી છોડી દીધી.
(૧૩-૯-૧૯૭૪)
સ્રોત
- પુસ્તક : વમળનાં વન (પૃષ્ઠ ક્રમાંક 37)
- સર્જક : જગદીશ જોષી
- પ્રકાશક : વોરા એન્ડ કંપની
- વર્ષ : 1976