રેખ્તા
હિન્દવી
સૂફીનામા
રાજસ્થાની
આ વગડો શો વરણાગી છે!
શતવિધ એની શોભા કેરી લગની મુજને લાગી છે,
આ વગડો શો વરણાગી છે!
આવળ, બાવળ, ખીજડા, હરમા દેખી મનડું મોહ્યું છે,
ધૂળ અને ઢેફાંની પ્રીતે હૈયું હરખી રોયું છે,
અવનીપટના અણુ અણુ સંગે ઉર મારું અનુરાગી છે.
આ વગડો શો વરણાગી છે!
તરણાંની કાયાના રંગો, ફૂલો પણ મેં દીઠાં છે,
વન વનનાં પંખીનાં ગીતો માણ્યાં કેવાં મીઠાં છે!
સુંદરનાં દર્શનને કાજે, આતુરતા નિત જાગી છે.
આ વગડો શો વરણાગી છે!
પાનખરે સૂના વગડામાં ઉર મારું ભીંજાયું છે,
વંટોળે વાયુની મીઠી વહાલપમાં વીંઝાયું છે,
વગડામાં વસ્તી દેખીને, વસ્તીને મેં ત્યાગી છે.
આ વગડો શો વરણાગી છે!
સ્રોત
- પુસ્તક : ઝૂલ ઝાલાવાડ ઝૂલ (પૃષ્ઠ ક્રમાંક 19)
- સંપાદક : ડૉ. રમણીકલાલ મારુ, રમેશ આચાર્ય
- પ્રકાશક : ગુજરાત સાહિત્ય અકાદમી
- વર્ષ : 2016