રેખ્તા
હિન્દવી
સૂફીનામા
રાજસ્થાની
વ્યર્થ જશે શું ફેરો?
દિવસ વીત્યો એમ જ ભટકારે,
પડી ગઈ અંતે સંધ્યા,
સપન-ફૂલ ક્યહીં ઢૂંઢું રે આ વન?
ભૂમિ આ એટલી વંધ્યા!
અવર ફૂલોનો વ્યર્થ મળી વીખરાતો વસંત મેળો.
દગ-પ્યાલી ખાલી ને ખાલી
લઈ જવી પાછી પડશે?
સૌન્દર્યો અધૂરાં પી પી ને
તરસ અગન વધુ બઢશે;
મૃગજળ દાખી છેતરતો રે મરુ સમ કાળ નમેરો!
નજરજાળ નાખું છું સ્થળ સ્થળ
આ જનઅર્ણવ આરે,
મુખમીનોનો ભાર નકામો
ઠાલવી દઉં મઝધારે,
મનને જેની રઢ લાગી તે ક્યાંય જડે ના ચ્હેરો!
સ્રોત
- પુસ્તક : સમસ્ત કવિતા (પૃષ્ઠ ક્રમાંક 318)
- સર્જક : ઉશનસ્
- પ્રકાશક : કવિશ્રી ઉશનસ્ અમૃત મહોત્સવ સન્માન સમિતિ
- વર્ષ : 1996