રેખ્તા
હિન્દવી
સૂફીનામા
રાજસ્થાની
શમણાનું પગલું
shamnanun pagalun
મનોજ ખંડેરિયા
મનોજ ખંડેરિયા
શમણાનું પગલું હું વીણું રે કેમ
એ તો નીરમાં તણાય લીલું પાંદડું.
વૃક્ષોની ઘેઘૂર ઘટાનો વળાંક
મારી આંખોમાં સળવળતો રહે
ઊંડેરી ખીણ મહીં ઢળતો અંધાર
મારા અંતરમાં ખળભળતો રહે
એકાદો ટહુકો કે એકાદું ચાંદરણું
દૂરનું લહેરાવે અહીં ઝૂંપડું.
બાવળની શૂળ તણી પીળી તીણાશને
એવું કુમાશથી હું જોતો
મારા તે વગડાઉ ગીતોની છાલકે
વ્હેતો પવંન વન સોતો
આંગળીઓ પીગળે તો
અત્તર થઈ જાય એવી મ્હેકે
કે બોળી લ્યો પૂમડું.
સ્રોત
- પુસ્તક : વરસોનાં વરસ લાગે (પૃષ્ઠ ક્રમાંક 42)
- સર્જક : મનોજ ખંડેરિયા
- પ્રકાશક : નવભારત સાહિત્ય મંદિર
- વર્ષ : 2011
- આવૃત્તિ : પુનર્મુદ્રણ