રેખ્તા
હિન્દવી
સૂફીનામા
રાજસ્થાની
ખારવણ હીબકાં ભરે
kharwan hibkan bhare
રમણીક સોમેશ્વર
રમણીક સોમેશ્વર
ખારવણ હીબકાં ભરે છે ને દરિયાની છાતી મૂંઝાય છે.
તૂટેલી હોડીને પૂછે છે ખારવણ
પોતાના દરિયાની વાત
ઝીલે છે હલ્લેસાં છાતીમાં
વિખરાતી મેલીને પોતાની જાત
સબ્બાક! દરિયાને કંઈનું કંઈ થાય છે
ખારવણ હીબકાં ભરે છે ને દરિયાની છાતી મૂંઝાય છે.
દરિયામાં ઓગળેલ દરિયાને ફંફોસે
ખંખોળી સાતે પાતાળ
આંખોમાં આંખો પરોવીને ખારવણ
દરિયાને પૂછે છે ભાળ.
અરે, અરે, દરિયાઓ સુકાતા જાય છે
ખારવણ હીબકાં ભરે છે ને દરિયાની છાતી મૂંઝાય છે.
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 417)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004