રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
સ્નેહરશ્મિ
મુજ વિદાય સમયે કો આ
મને પાછળથી બોલાવે?
મને કોણ ફરી બોલાવે?
રે ‘જા મા! જા મા!' એવાં
આ ઘર ઘરનાં સૌ નેવાં
છલ છલ થાતાં હીબકાં લેતાં
વચનો કેમ સુણાવે?
મને કોણ ફરી બોલાવે?
આ વનની કુંજે કુંજે
આ પુષ્પ તણા નવ પુંજે—
રે ભીની વ્યાકુળ આંખો કોની
હૈયે અશ્રુ વહાવે?
મને કોણ ફરી બોલાવે?
આ અનિલની લહરે લહરે,
આ ગિરિ ગિરિઓની કુહરે,
રે મુખરિત નિ:શ્વાસો આ કોના
પ્રાણે કંપ જગાવે?
કો ફરી ફરી બોલાવે?
આ અસીમ નભની સીમા,
નિજ આતુર સાદે ધીમા,
મુજ આગળ વધતાં અસ્થિર ડગલાં
ક્યમ ફરી પાછાં વાળે?
મને કોણ કહો બોલાવે?
નહિ પ્રયાણ શકું આ ટાળી,
ક્યમ સ્નેહ શકું વળી ખાળી? —
કો કો’ ધરતીની રજ રજને કે,
વિદાય હવે અપાવે!
મને કોણ ફરી બોલાવે?
મુજ વિદાય સમયે કો આ
મને પાછળથી બોલાવે?
મને કોણ ફરી બોલાવે?
સ્રોત
- પુસ્તક : સકલ કવિતા (પૃષ્ઠ ક્રમાંક 241)
- સર્જક : સ્નેહરશ્મિ
- પ્રકાશક : વિદ્યાવિહાર પ્રકાશન
- વર્ષ : 1984