વેગળી રહો જી મિરાત રે

મારી વેગળી રહો જી મિરાત રે,

મારે હળવી તે ચાલની નિરાંત રે.

હાંસડી કે હાર મારે હૈયે નહિ ધારવાં

ને બાજુબંધ, ડૂલ દૂર મેલું;

નાનેરી કેડનો ન જો'યે કંદોર,

નહિ ઝાંઝરને સૂર મન ઘેલું;

અરે આટલાની તે શી વિસાત રે.

ઈંડાંનો અંતરાય દૂર થિયો ને

પાંખ વીંઝે મરાલ માનઘેલો,

આ રે હવાનો ન ભાર કંઈ હોય

એને આભનોય મારગ સ્હેલો;

નહિ છાયા, નહિ અંધારી રાત રે.

જેનો જાગે છે મારા હૈયામાં કંપ

એવી વાણી ઓ પારથી આવે,

વાયરાનો વેગ મને ઓછો પડે જી

એવું હૈયું ભરાઈ જાય ભાવે,

મારી તેજની સોહામણી હો જાત રે.

veglii rhao jii miraat re