વગડે ઊગેલ ઝાડ હોઉં એમ

વગડે ઊગેલ કોઈ ઝાડ હોઉં એમ

મારે માથે ને હાથે

આ તીડ અને તમરાંઓ સાગમટે આવીને બેસે.

જાઉં જો ઉડાડવા, તો વ્હેતા આ વાયરામાં

ડાળીઓ હલે – ની જેમ

થોડાં ઊડીને ત્યાં જ ર્હેશે.

તારાઓ આભ થકી ઊતરીને આવે

ને ગોઠડી ચકાવે છે

પાંપણના પલકારા સંગે,

જાતને ન જાણ થાય એમ

અહીં ઓચિંતુ ચારે દિશાએથી

અંધારું આખો મને રંગે,

આસપાસ ઝાડિયું તો લટિયાળા બાવાની જેમ

મારી સામે જુએ ને

હવે લાગે કે કંઈક કહી દેશે.

કાલ હજી કોરી કાળી માટી હતી ત્યાં

આજ ઊગતી સવારે ઝરે

ભીનાં તરણાંનો લીલો રંગ

ટાઢી એકલતાની ભીતરમાં જાગે ને

ને ઠેઠ સુધી લાગે છે

ક્યાંક કોઈ હૂંફાળો સંગ;

ચકલાઓ આવી અહીં મોતી ચૂગે છે

એમાં કૌતુંક કેવું ને કેવી વાત,

જરા પૂછો તો તરણાંઓ કહેશે!

Vagade Ugek Koi Zaad Hou Em