બોલાવે સ્હેજ મા મલકો ઉતાવળાં

બોલાવે સ્હેજ મા મલકો ઉતાવળાં

વેળા કવેળાનાં માંડોની મૂલ!

મધરાત્યું મેલીને ધોળે તે દિવસે

વરસો મા ચાંદનીનાં રૂપેરી ફૂલ!

ઘેરા અંધારામાં સોડમની કેડીએ

ગોત્યે જડે ઈ રાતરાણી!

તરસ્યુંની આગમાં હોમી દ્યે અંગ તંઈ

સાચું કે’વાય એને પાણી!

છલકે બધાય એને સાયર મ જાણીએ

ચળકે સંધુંય નો’ય મોતી અમૂલ!

પરખી લ્યો અમિયલ મોસમનું વાદળું

માવઠાનું ગાજવું તે ઠાલું!

સોંઘા સનકારે કૈં મોંઘા અબોલડા

હું તો ના આમ કદી આલું!

મોરલાના ટૌકામાં મોહ્યું ના પાલવે

ગોતી લ્યો ગરવા કો’ સારસનાં કુલ!

bolave shej maa malko utaavalaan