અનુભૂતિ

અનુભૂતિ

પાંદડી તે પી પીને કેટલું રે પીશે

કે મૂળિયાંને પડવાનો શોષ?

આભ જેવા આભને હૈયામાં હોય કદી

જળમાં વરસ્યાનો અફસોસ?

એક પછી એક મોજાં આવે ને જાય

એને કાંઠે બેસીને કોણ ગણતું?

વાદળના કાફલાનું ગીત અહીં લ્હેરખીમાં

રેશમનો સૂર રહે વણતું;

ઉઘાડી આંખે આ જાગતા ઉજાગરાને

આઘાં પરોઢ આઠ કોશ!

નીંદરતી આંખમહીં ઊમટીને ઊભરાતું

જાગે છે સપનાનું ટોળું,

કિરણોની એક એક કાંકરીઓ નાખીને

જંપ્યું તળાવ નહિ ડ્હોળું

આખા આકાશને ઓઢીને ઠરવાનો

જળને છે ઝીણો સંતોષ!

Anubhuti