તૂટેલી ડાળખીનાં ફૂલ

તૂટેલી ડાળખીનાં ફૂલ

ખીલવું છે તોય હવે ખીલીએ રે કેમ?

અમે તૂટેલી ડાળખીનાં ફૂલ.

વીતેલા આયખાનું રોજ રોજ ગાવાનું

બેસૂરું અધ્ધરિયું ગાણું,

ટેરવામાં બેસીને નીતરતા અંગૂઠે

પાથરું રે કેમ અજવાળું

આવવું છે તોય હવે આવીએ રે કેમ?

તમે રસ્તાની ધખધખતી ધૂળ...

ખીલવું છે તોય હવે ખીલીએ રે કેમ?

અમે તૂટેલી ડાળખીનાં ફૂલ

ઘૂંઘટને ઘૂંટીને ટોડલાએ બાંધેલા

અવસરનું એક એક પાનું,

રાતીછમ્મ વેદનાને અંતરમાં ઠેલીને

નીગળતો ચૈતર થૈ છાનું

ઊગવું છે તોય હવે ઊગીએ રે કેમ?

અમે તૂટેલાં વિખરાતાં મૂળ...

ખીલવું છે તોય હવે ખીલીએ રે કેમ!

અમે તૂટેલી ડાળખીનાં ફૂલ.....

tuteli Dalkhinan phool