તુજ સુખની મ્હેફિલમાં તું સહુને નોતરજે

તુજ સુખની મ્હેફિલમાં તું સહુને નોતરજે,

પણ જમજે અશ્રુની થાળ એકલો;

હોંશીલા જગને હસવા તેડું કરજે :

સંઘરજે ઉરની વરાળ એકલો.

તુજ દ્વારે દ્વારે દીપકમાલ ચેતવજે :

ગોપવજે દિલ-અંધારા એકલો;

બીજાંને આંગણ અમૃત-ઝરણાં રેલવજે :

પી લેજે વિષ તારાં તું એકલો.

તુજ ગુલશનનાં ગુલ જે માગે તેને દેજે,

ને સહેજે સર્પોના દંશ એકલો;

કીર્તિની કલગી સહિયારે કર દેજે :

ભોગવજે બદનામી-અંશ એકલો.

દિલદિલની દુઃખ-વાતો દિલસોજીથી સુણજે:

ચૂપ રહેજે કાપી જબાન એકલો;

કો થાકેલા પગની કાંકર ચૂમી લેજે :

કદમો ભરજે કંટક પર એકલો.

tuj sukhni mhephilman tun sahune notarje