રેખ્તા
હિન્દવી
સૂફીનામા
રાજસ્થાની
તોય મા તે મા!
toy ma te ma!
ઝવેરચંદ મેઘાણી
ઝવેરચંદ મેઘાણી
અપમાનિતા-અપયશવતી તું : તોય મા તે મા!
પરવશ-પરાજિત લથડતી તું : તોય મા તે મા!
તુજ પરાજયની ધૂળને
ધરશું અમારે મસ્તકે :
ચરણો વીંધાયલ કંટકે ચૂમી લઈશું, મા!
મધરાત મારગમાં પડી.
આકાશ ઝીંકે છે ઝડી :
તું મૂર્છિતા ને આંધળી : દોરી જઈશું, મા!
તુજ ખોળલા ભરિયલ હતા,
ત્યાં લગી મીઠા લાગતા!
ખાલી પડી! -આપી ખતા ચાલ્યા ન જાશું, મા!
ચાલ્યા જનારા છો જતા-
અણસમજના શા ઓરતા!
પણ તને ઠોકર મારતા ક્યમ જવા પામે, મા!
તું તો નવલ યુદ્ધે ચડી,
આલમ બધી જોવા ખડી :
તે સમે તારી ઠેકડી કપૂતો જ કરશે, મા!
હીણાયલી-રોળાયલી તુ : તોય મા તે મા!
જે હતી તે-ની તે જ છે તું દિલ અમારે, મા!
રસપ્રદ તથ્યો
‘જન્મભૂમિ' માટે ધારાસભાની ચૂંટણી વેળા.
સ્રોત
- પુસ્તક : સોના નાવડી (પૃષ્ઠ ક્રમાંક 60)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997