ટેરવાં

ટેરવાં

ટેરવાં મૂંગાં ને એનો લાખેણો લલકાર

કસબી! લાખેણો લલકારo

ટેરવાંથી નાચે મારા

તંબૂરાના તાર ઝીણા,

નાચે રે વીણાના ઝનનન

ઝનનન ઝન ઝંકાર –

કસબી! ઝનન ઝન ઝંકાર–ટેરવાંo

છૂટે રે અંબોડે ધૂણે

જેવી કોઈ જોગણી રે,

ટેરવાંથી મંજીરા એમ

નાચે થૈથૈકાર –

કસબી! નાચે થૈથૈકાર–ટેરવાંo

ટેરવાંની ટીચકીથી

તબલાંનો તાલ નાચે,

તોડા ને મોડાની થાપી,

ધીંગો રે થડકાર –

કસબી! ધીંગો રે થડકાર–ટેરવાંo

ટેરવાંથી નાચે છૈયું,

હોઠ નાચે, નાચે હૈયું,

ટેરવાંની મૂંગી મૂંગી

સંગનામાં સાર –

કસબી! સંગનામાં સાર–ટેરવાંo

ટેરવાંથી નાચે મારા

બેરખાના પારેપારા,

ટેરવાં દેખાડે અનહદ

સોહમ્ ને સંસાર –

કસબી! સોહમ્ ને સંસાર–ટેરવાંo

ટેરવાં છે કામનાં ને

ટેરવાં છે રામનાં રે,

જેવી જેની તરસ એવો

છલકે પારાવાર –

કસબી! છલકે પારાવાર–ટેરવાંo

Terva