ટેકરીનો નિસાસો

ટેકરીનો નિસાસો

પેલી લીલીછમ ટેકરીનો ટુકડો

નિસાસા હજી નાખે.

આવી આલીહાણ નગરી ને નગરીમાં ઠેરઠેર ઊભરાય માણાંહ,

ઠેકાણે પાડવાને એને આ રાતદિન ખડક્યે રાખીને ભાઈ, પાણા,

ટેકરીને મૂળમાંથી ખોદી નાખીને પછે ટેકરો ચણાવવાનાં ટાણાં,

થોડી લીલપ ક્યાંય બાકી રહે તો એને

કાચની દીવાલુંમાં રાખે! –

ઝાડવાંનાં માથાં ઉડાડીને રઘવાયું લોક જરા ક્યાંક ઝાડ રોપે,

છાપરાંને માથે ઇ કૂંડાં થાપે ને કિયે, કેવો બગીચો અહીં ઓપે!

બોલોને, જંગલનો દેવ પછે કાળઝાળ, એના પર કેમ નહીં કોપે?

લીલૂડી જિંદગીને સોરી નાખીને પછે

દંનનો દુકાળ સહુ ભાખે –

પેલી લીલીછમ ટેકરીનો ટુકડો

નિસાસા હજી નાખે.

Tekari No Nisaso