ટેભો ગૂંથાયો મારી આંગળીના ટેરવે, જીવતરિયું ગૂંથાયું નૈ

ટેભો ગૂંથાયો મારી આંગળીના ટેરવે, જીવતરિયું ગૂંથાયું નૈ.

સૈ, હું તો જીવતરિયું ગૂંથતી રૈ...

સગપણના સૂતરથી સમણાંઓ ટાંક્યાં

પણ આભલામાં ઝબકારો નૈ.

કાપડે ભરી ભાત ભારે સોહામણી

પણ મોરલામાં ટહુકારો નૈ.

સખદખનાં ટેરવાંઓ માગે હિસાબ હું તો લોહીઝાણ ઝૂરતી રૈ.

સૈ, હું તો જીવતરિયું ગૂંથતી રૈ...

ઝમરકિયા દીવડાના ઝાંખા અજવાસમાં

ચાકળાને ચંદરવા જોતી,

ઓરતાઓ અંતરમાં સાવ રે અણોહરા

હું આણાં અભાગિયાંને રોતી.

વરણાગી સપનાંની લાંબી વણજાર મારી આંખ્યુંમાં ખૂંચતી રૈ,

સૈ, હું તો જીવતરિયું ગૂંથતી રૈ...

tebho gunthayo mari anglina terwe, jiwatariyun gunthayun nai