તરણાંની જેમ મને ફૂટે છે ગીત

તરણાંની જેમ મને ફૂટે છે ગીત

અને ઝરણાંની જેમ જાય વહેતાં,

હરણાંની જેમ એ તો ભટકે છે બાવરાં

ને કહેવાનું કાંઈ નથી કહેતાં.

ગીતોમાં ઘૂઘવે છે ભૂરું આકાશ

અને સમણાંનો દરિયો ને રેતી,

કમળોને ખીલવાને એવી છે પ્યાસ

કે પાંદડીઓ ભમરાને ભેટી.

કોણ હવે ભમરો ને કિયા ભવે પાંદડી

ને કોનાં વમળ ને કોણ સહેતા!

મખમલિયો એક એવો છલક્યો છે બાગ

એમાં પંખી ને ઝાડ બધું એક,

ચંપો ને ગુલછડી સળગી ઊઠયાં, ને હવે

બાવળને મળી ગઈ મ્હેક.

કોની છે મીટ અને કોની છે પ્રીત

તમે પૂછો ને ચૂપ અમે બેઠા.

tarnani jem mane fute chhe geet