રેખ્તા
હિન્દવી
સૂફીનામા
રાજસ્થાની
તમે આવ્યાં ને આ...
tame awyan ne aa
માધવ રામાનુજ
માધવ રામાનુજ
તમે આવ્યાં ને આ અમથું અમથું મૌન ઊઘડ્યું,
ગયાં ગોરંભીને ઘન વરસી, આકાશ ઊઘડ્યું,
થીજ્યાં આંસુ ઓથે સ્મરણ અધરે સ્મિત ઊઘડ્યું.
-યુગોથી વેંઢારી નરી અલગતા ચંદ્ર ફરતો
રહે, મારું યે આ જીવતર વીત્યું એ જ ગતિમાં
તમારા આવ્યાનો કલરવ ભરી યાન ઊતર્યું
અને રૂંવે રૂંવે પ્રથમ પળનું દર્દ ઊઘડ્યું!
અષાઢી રાતોનાં રિમઝિમ બધાં ગીત ફણગે
તમારાં આછેરા કુમકુમ ડગે—સ્તબ્ધ ફળિયે;
ઝરૂખે ટાંગેલી નીરવ ઠીબની પાંખ ફરકે
તમારી કીકના સજલ ટહુકે મુગ્ધ નળિયે
ઝમે આળો આળો દિવસ, ઘરમાં રાત રણકે!
ઘડી ઊભાં રે’જો ઉંબર પર સિંદૂરવરણાં,
તમારા સેંથામાં મિલન-પળનું મૌન ભરી દા’.
સ્રોત
- પુસ્તક : તમે (પૃષ્ઠ ક્રમાંક 83)
- સર્જક : માધવ રામાનુજ
- પ્રકાશક : આર. આર. શેઠની કંપની
- વર્ષ : 1986
- આવૃત્તિ : બીજી આવૃત્તિ