રેખ્તા
હિન્દવી
સૂફીનામા
રાજસ્થાની
વેણીભાઈ પુરોહિત
સુખનાં સુખડ જલે રે
મારા મનવાં!
દુઃખનાં બાવળ બળે—
બળે રે જી....દુ:ખનાં બાવળ બળેo
સુખડ જલે ને થાય ભસમની ઢગલી ને
બાવળના કોયલા પાડે—
મારા મનવા!
તરસ્યા ટોળે વળે.
વળે રે જી....દુ:ખનાં બાવળ બળેo
કોઈનું સુખ ખટરસનું ભોજન,
કોઈ મગન ઉપવાસે:
કોઈનું સુખ આ દુનિયાદારી,
કોઈ મગન સંન્યાસે:
રે મનવા!
કોઈ મગન સન્યાસે:
સુખનાં સાધન ને આરાધન
લખ ચકરાવે ચડે....
ચડે રે જી...તરસ્યા ટોળે વળેo
કોઇ પરમારથમાં સુખ શોધે,
કોઈ પરદુ:ખે સુખિયા:
ભગત કરે ભગતીનો ઓછવ,
કોઇ મંદિરના મુખિયા:
રે મનવા!
કોઇ મંદિરના મુખિયા:
સમદુખિયાંનો શભુમેળો
ભવમાં ભેગો મળે,
મળે રે જી....લખ ચકરાવે ચડેo
રંગવિલાસી ભોગી દીઠા,
જોગી બ્રહ્મ-વિલાસી:
પામર સુખ, અજરામર સુખના
સહુને દીઠા પ્યાસી:
રે મનવા!
સહુને દીઠા પ્યાસી:
બધા ઝઝૂમે-
બધા ઝઝૂમે ઝંખી-ડખી
સળગે કે ઝળહળે,
હળે રે જી....ભવમાં ભેગા મળેo
સુખનાં સુખડ જલે રે
મારા મનવા!
દુ:ખનાં બાવળ બળે.
સ્રોત
- પુસ્તક : સિંજારવ (પૃષ્ઠ ક્રમાંક 123)
- સર્જક : વેણીભાઈ પુરોહિત
- પ્રકાશક : એન. એમ. ત્રિપાઠી લિ.
- વર્ષ : 1955