રેખ્તા
હિન્દવી
સૂફીનામા
રાજસ્થાની
દિવ્ય સર્જકો
divya sarjako
માધવ રામાનુજ
માધવ રામાનુજ
મૂળ તો ભીનું ભીનું ખસે
પાણી પવન અને મન જેવું
એ ધસમસ ના ધસે… મૂળ તો૦
કદી નથી જોવાનાં જેને એને માટે ઝૂરે
પાણી, પોષણ, પ્રેમ જે કહો—પળે પળે એ પૂરે,
માટીના મુંઝારા વેઠે, અંધારામાં વસે… મૂળ તો૦
કણ કણમાંથી પોષણ ખેંચી રહ્યું હશે શી રીતે?
કોમળ કહેવું કેમ, ઝૂઝતું ભીતર એ જે રીતે!
ટોચ સુધી પહોંચાડે જીવન,
કયા શ્વાસ એ શ્વસે... મૂળ તો૦
રૂપ અસલ ધરતીનું અંદરથી ઉપર એ લાવે
સૌંદર્યોનાં મૂળ રહસ્યો કદી બ્હાર ના આવે!
ધરતીનાં હૈયામાં કેવાં દિવ્ય સર્જકો વસે...
મૂળ તો ધીમું ધીમું ખસે...
સ્રોત
- પુસ્તક : અનહદનું એકાંત (પૃષ્ઠ ક્રમાંક 82)
- સર્જક : માધવ રામાનુજ
- પ્રકાશક : ઇમેજ પબ્લિકેશન્સ
- વર્ષ : 2012