શું નટવર વસંત થઈ થઈ નાચી રહ્યો

શું નટવર વસંત થઈ થઈ નાચી રહ્યો!

નાચી રહ્યો જગ નચાવી રહ્યો!— શું...

કોયલ મધુરી મુરલી બની છેડે નટવર કાન,

વિરહ ઘેલી ગોપી ઘણું તજી નીકળી અભિમાન;

રસિયા વિનાની બની બાળાઓ બ્હાવરી,

વેણુ વસંત ચિત્ત વીંધી ગયો— શું...

શીતળ સુખકર પવનની લ્હેર ઘુમે ચોપાસ,

જાણું રાધા કૃષ્ણજી રાસ રમે છે ખાસ;

વિધ વિધ પંખીના વેણુ ઘુઘરી ઘમકે રે

મહિં મહિં મેનાના નાદ ઝાંઝર ઝમકે રે

નવ પલ્લવ વાઘો ધરી પચરંગી શિર પાઘ

ફાગ લાગ સાંધી રમે મદનરાજ મહારાજ!

લ્હેરી લાલાથી રમે લલનાઓ લાડમાં

પ્રીતિ ગુલાલ લાલ છાઈ ગયો— શું...

shun natavar vasant thaii thaii naachii rahyo