રેખ્તા
હિન્દવી
સૂફીનામા
રાજસ્થાની
મંથન
manthan
જોઈતારામ પટેલ
જોઈતારામ પટેલ
કરવું શેં ચિતરામણ તારું પળપળ તું પલટાતી જી;
એક પળે નરદમ શરમાતી, બીજી પળ મદમાતી જી!
એક પળે મેં સાળુ ચોળી ચણિયો ચીતર્યાં,
બીજી પળ તો વસ્ત્ર નહીંવત્ પહેરી તું મલકાતી જી;
હમણાં તો મેં શીલગૂંથ્યો અંબોડો ચીતર્યો,
તેં કીધા ફરફરતો ત્યાં તો કલાપ ને છલકાતી જી!
કરવું શેં ચિતરામણ તારું, પળપળ તું પલટાતી જી.
હેતમઢ્યાં મેં લજ્જા નમણાં પગલાં ચીતર્યાં,
બીજી પળ તું ચંચલ ચરણે છટકી ઝટપટ જાતી જી;
હાથ-હથેળી કંગન-મહેંદી શોભન ચીતર્યાં,
પળમાં બંધન છોડી એનાં દઈ તાલી લહરાતી જી!
કરવું શેં ચિતરામણ તારું, પળપળ તું પલટાતી જી.
ભાવસભર મેં ચહેરો તારો હોંશે ચીતર્યો,
ત્યાં બુદ્ધિનું લેપન ઝળકે, બનતી ગૌરવ-તાતી જી;
ઉરઘેલીની અંતર રમતી રમણા ચીતરી,
રમણી! ઇચ્છું રામદુહાઈ : જોજે ત્યાં બદલાતી જી!
કરવું શેં ચિતરામણ તારું, પળ પળ તું પલટાતી જી;
એક પળે નરદમ શરમાતી, બીજી પળ મદમાતી જી!
સ્રોત
- પુસ્તક : લીલપ લાગણીની (પૃષ્ઠ ક્રમાંક 13)
- સર્જક : જોઈતારામ પટેલ
- પ્રકાશક : કાવ્યગોષ્ઠિ પ્રકાશન
- વર્ષ : 1977