શ્રાવણ નીતર્યો

શ્રાવણ નીતર્યો

આ શ્રાવણ નીતર્યો સરવડે કોઈ ઝીલોજી

પેલાં રેલી ચાલ્યાં રૂપ હો કોઈ ઝીલોજી.

આ કપૂરકાયા સરી જશે કોઈ ઝીલોજી

પેલા ઊડી ચાલ્યા ધૂપ હો કોઈ ઝીલોજી.

આ જલધરામાં ઝૂલતી કોઈ ઝીલોજી

પેલી તૂટે મોતનમાળ હો કોઈ ઝીલોજી.

આ લટ લહેરાતી લળી લળી કોઈ ઝીલોજી

પેલું કોણ હશે મરમાળ? હો કોઈ ઝીલોજી.

આ નથી ટપકતાં નેવલાં કોઈ ઝીલોજી

આ વરસે અમરતમેહ હો કોઈ ઝીલોજી.

આ શમણાં કેરા કરા પડે કોઈ ઝીલોજી

આ નરદમ વરસે નેહ હો કોઈ ઝીલોજી.

આ ચળકે વાદળતલાવડી કોઈ ઝીલોજી

એની તડકે બાંધી પાળ હો કોઈ ઝીલોજી.

આ દિન વહી ચાલ્યો સુહામણો કોઈ ઝીલોજી

આ રાત ચલી રઢિયાળ હો કોઈ ઝીલોજી.

આ દૂધે ધોયા ડુંગરા કોઈ ઝીલોજી

પેલી ઝરણાંની વણજાર હો કોઈ ઝીલોજી.

આ જતીસતીનાં તપ રેલે કોઈ ઝીલોજી

પેલા શિવલોચન અંબાર હો કોઈ ઝીલોજી.

shrawan nitaryo