રેખ્તા
હિન્દવી
સૂફીનામા
રાજસ્થાની
સ્હેજસાજ ચૂમેલી હોય તું
shejsaj chumeli hoy tun
જયેન્દ્ર શેખડીવાળા
જયેન્દ્ર શેખડીવાળા
અજવાળી રાત શી અંધારા વન વચ્ચે
ક્યાંય ક્યાંક ઊભેલી હોય તું
ક્યાંક ક્યાંક કોઈ નિશાપંખીની જેમ
તને સ્હેજસાજ ચૂમેલી હોય તું
ચન્દ્રાવન ઝૂક્યું રે ઊંઘણશી આંખભેર ઝોલારે જીવતા વિજનમાં
ઝાંખો પવન થઈ અમથેરું તરતો હું હોડી લઈ ભીના સ્વજનમાં
ચંદન તલાવડીના સૂના ઓવારા પર
કોણ ફરે મ્હેક મ્હેંક મ્હેંક તું...
અજવાળી રાત શી અંધારા વન વચ્ચે
ક્યાંય ક્યાંક ઊભેલી હોય તું
ઊતર્યું આકાશ એમ આંખોમાં જેમ જાણે ટહુકો પ્રવેશ્યો રે કાનમાં
પોયણાની પાંપણ પર બેઠું છે મન જઈ કોઈ કહો કોના રે ધ્યાનમાં
ટહુકારે કોયલના ચોંકી ઊઠ્યું રે કવિ!
ઝરણે પાતાળ કૈં આભ શું
અજવાળી રાત શી અંધારા વન વચ્ચે
ક્યાંય ક્યાંક ઊભેલી હોય તું
ક્યાંક ક્યાંક કોઈ નિશાપંખીની જેમ
તને સ્હેજસાજ ચૂમેલી હોય તું
અજવાળી રાત શી અંધારા વન વચ્ચે
ક્યાંય ક્યાંક ઊભેલી હોય તું
સ્રોત
- પુસ્તક : ચૂંટેલી કવિતા : જયેન્દ્ર શેખડીવાળા (પૃષ્ઠ ક્રમાંક 27)
- સંપાદક : જયેન્દ્ર શેખડીવાળા
- પ્રકાશક : ગુજરાત સાહિત્ય અકાદમી
- વર્ષ : 2020