રેખ્તા
હિન્દવી
સૂફીનામા
રાજસ્થાની
કૂકડાનું ગીત
kuukdaanun giit
કૃષ્ણલાલ શ્રીધરાણી
કૃષ્ણલાલ શ્રીધરાણી
અમે તો સૂરજના છડીદાર,
અમે તો પ્રભાતના પોકાર!... ધ્રુવ.
સૂરજ આવશે સાત ઘોડલે,
અરૂણ રથ વ્હાનાર!
આગે ચાલું બંદી બાંકો,
પ્રકાશ-ગીત ગાનાર!... અમે0
નીંદરને પારણીએ ઝૂલે,
ધરા પડી સૂનકાર!
ચાર દિશાના કાન ગજાવી,
જગને જગાડનાર!... અમે0
પ્રભાતનાયે પ્રથમ પ્હોરમાં
ગાન અમે ગાનાર!
ઊંઘમાં ભરેલાં સર્વ પોપચે
જાગૃતિ-રસ પાનાર!... અમે0
જાગો, ઊઠો ભોર થઈ છે,
શૂરા બનો તૈયાર!
સંજીવનનો મંત્ર અમારો,
સકલ વેદનો સાર!... અમે0
[ઉત્તરાર્ધ]
જાગે જગના પ્રાણ સહુ પણ,
વ્યર્થ બધો પોકાર!
આભ ચીરું હું તોય ન પહોંચે,
નાદ મૃત્યુને પાર!... અમે0
મૃત્યુ કેરી નીંદ ચિરંતન,
ક્યાં છે જગાડનાર?
સૂર્યકિરણ જે પાર ન પહોંચે,
શા ખપનો છડીદાર?
અમે તો સૂરજના છડીદાર,
અમે તો પ્રભાતના પોકાર!
સ્રોત
- પુસ્તક : સોનાની ગાડી, રૂપાના પાટા (પૃષ્ઠ ક્રમાંક 90)
- સંપાદક : તૃષિત પારેખ
- પ્રકાશક : ગુજરાત સાહિત્ય અકાદમી
- વર્ષ : 2006