રેખ્તા
હિન્દવી
સૂફીનામા
રાજસ્થાની
પ્રદ્યુમ્ન તન્ના
ભૂરી ડુંગર ઓળ્ય રે -ધ્રાંગડ! સૂડાં લીલાં લોલ્ય રે -ધ્રાંગડ!
ચાંચે રાતી ચોળ્ય રે -ધ્રાંગડ! ચૂગે ઊભાં મોલ્ય રે -ધ્રાંગડ!
ઉગમણાંની કોર્ય રે -ધ્રાંગડ! વાગતાં ઢમક ઢોલ્ય રે -ધ્રાંગડ!
આભ ભરી પડઘાય બળુકા બોલ્ય રે એનાં ધ્રાંગડ ધ્રાંગડ!
શ્રાવણ વદ આઠમ્યને મેળે ઢોલ્ય ધડૂકે ધ્રાંગડ ધ્રાંગડ!
ભરિયાં ભરિયાં હાટ્ય રે -ધ્રાંગડ!
દુકાન્યુંના ઠાઠ્ય રે -ધ્રાંગડ!
માલ શા મોંઘા દાટ્ય રે -ધ્રાંગડ!
પળીએ હાલો વાટ્ય રે -ધ્રાંગડ!
નીકળીએ પણ ક્યમ જ્યહીં લોક વધતું હાયે આંગળ આંગળ!
શ્રાવણ વદ આઠમ્યને મેળે ઢોલ્ય ધડૂકે ધ્રાંગડ ધ્રાંગડ!
રાહડાને હિલ્લોળ્ય રે -ધ્રાંગડ!
છલકે છાનાં કોડ્ય રે -ધ્રાંગડ!
પજવણી લે છોડ્ય રે -ધ્રાંગડ!
પાડ્ય હવે સઈ! ફોડ્ય રે-ધ્રાંગડ!
કોણ રમે મારી જોડ્યમાં હામો લટકાળો ને બાંગડ બાંગડ?!
શ્રાવણ વદ આઠમ્યને મેળે ઢોલ્ય ધડૂકે ધ્રાંગડ ધ્રાંગડ!
માંજરા એના નેણ રે -ધ્રાંગડ!
અદકી કરે શેણ રે -ધ્રાંગડ!
એક ન આછું વેણ રે -ધ્રાંગડ!
તોય ક્યા મોઘમ કે'ણ રે -ધ્રાંગડ!
ચિતના તે લઈ જાય છડેચોક છેન હંધાયે જાંગડ જાંગડ
શ્રાવણ વદ આઠમ્યને મેળે ઢોલ્ય ધડૂકે ધ્રાંગડ ધ્રાંગડ!
(૧૯૮૮)
સ્રોત
- પુસ્તક : છોળ (પૃષ્ઠ ક્રમાંક 63)
- સર્જક : પ્રદ્યુમ્ન તન્ના
- પ્રકાશક : પ્રસાર, ભાવનગર
- વર્ષ : 2000