સપનું આવ્યું કે

સપનું આવ્યું કે

એક દિવસ રેતીને સપનું આવ્યું કે મારો સાવ રે

સુકાઈ ગયો દરિયો,

ક્યાં છે તરંગનાં એ ઊડતાં પંખીઓ? કઈ જાળમાં

ફસાઈ ગયો દરિયો

સેલારા લેતી શોષાઈ ગઈ માછલીઓ

શઢના લીરામાં ઊડે ચીસ;

શંખલા ને છીપલાંના ફાટ્યા ડોળાઓ કેમ

નીરખે છે દખ્ખણની દિશ?

ક્યાંય નહીં સાંભળું હું એનો ઘૂઘવાટ : કયા દરિયામાં

ડૂબી ગયો દરિયો?

એક દિવસ રેતીને સપનું આવ્યું કે મારો સાવ રે

સુકાઈ ગયો દરિયો!

મારો લીલો દરિયો અને ભૂરો દરિયો :

મારા દરિયાનો ઝળહળતો રંગ;

ઝાકળની જેમ એ તો ઊડી ગયો ને

મારા કાંઠાઓ થઈ ગયા તંગ.

આછે નિઃશ્વાસ મારે હૈયેથી સરતો ત્યાં આંખોનો

છળી ઊઠ્યો દરિયો :

એક દિવસ રેતીને સપનું આવ્યું કે મારો સાવ રે

સુકાઈ ગયો દરિયો!

sapnu aavyu ke